الصعايده اجدع ناس لما بتحب ولما بتفرح ولما بتبدع حتى فى احزانهم احزان قاسيه ينفطر لها القلب .....وشاعرنا القناوى عبد الرحمن الابنودى امتعنا بقصائده الرائعه مع حليم00 انا كل ما اقول التوبه ترمينى المقادير ...وعلى حسب وداد قلبى يا بوى وغيرها كتير وكتير بس حقيقى هذه القصيده كادت ان تفطر قلبى من الحزن لأقترابها من بيئتى ومشاعرى وكأنها تعبر عن واقع ولهجه اعيش فيها وبها ومنها
يامنة
والله وشبت يا عبد الرُّحمان !!
أبيض شعرك عجّزت يا واد .؟
ياواد مُسْرَعْ؟
ما أسرع مرور الأيام !ميتى وكيف؟
عاد اللي يعجّز في بلاده غير اللي يعجز ضيف !!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت: كبر عبد الرحمان !!
أمال انا على كده مت بقى لي ميت حول ؟ ميت حول
والله خايفة ياوليدي القعدة لتطول
ياوليدي خايفة العمر يطول
مات الشيخ محمود وماتت فاطنة ابْ قنديل
وانا لسة حية..حية وباين حاحيا كمان وكمان
عشت كتيرعشت لحد ماشفتك عجّزت يا عبد الرحمان
وقالولي قال خَلَّفت وانت عجوز خلَّفت يااخوي؟؟
وبنات..!!؟أمال كنت بتعمل إيه طيلة العمر اللي فات؟
دلوقت مافقت؟دلوقت ما فقت
وجايبهم دِلْوكْ تعمل بيهم إيه؟
على كلٍّ ..أهي ريحة من ريحتك عالأرض.يونسُّوا بعض
ماشي يا عبد الرحمان
أهو عشنا وطلنا منك بصة وشمة نلنا رؤياك و لقياك
دلوك بس ما فكرت ف يامنة وقلت: يا عمة؟؟
حبيبي انت يا عبدالرحمان
الله حبيبي .. وتتحب على قد ماسارقاك الغربة
لكن ليك قلب حنون مش زي ولاد الكلب اللي نسيونا زمان
حلوة مرتك وعويْلاتك زوجتك و أطفالك والاّشبهنا..؟
سميتهم إيه؟قالولي : آية ونور
ماعارفشي تجيب لك واد؟
والاّ أقولك : يعني اللي جبناهم..نفعونا في الدنيا بإيه؟
غيرشي الانسان مغرور
ولسه يامنة حاتعيش وحاتلبس لمّا جايب لي قطيفة وكستور؟
كنت اديتهمني فلوس اشتري للركبه دهانآ..
با..ي ما مجلّع قوي ياعبد الرحمان طب ده انا ليّا ستّ سنين مزروعة في ظهر الباب
لم طلّواعلينا أحبة ولا أغراب خليهم ...
ينفعواأعملهم أكفان !!ا
كرمش وشي فاكر يامنة وفاكر الوش؟
إوعى تصدقها الدنياغش ف غش !!
إذا جاك الموت يا وليدي موت على طول
اللي اتخطفوا فضلوا أحباب صاحيين في القلب كإن ماحدش غاب
واللي ماتوا حتة حتةونشفوا وهم حيين ...
حتى سلامو عليكم مش بتعدي من بره الأعتاب
أول مايجيك الموت .. افتح أول ماينادي عليك ..
إجلح إنت الكسبان إوعى تحسبها حساب ...
.بلا واد .. بلا بت ...ده زمن يوم مايصدق .. كداب !!
سيبها لهم بالحال والمال وانفدأنجو بنفسك
إوعى تبص وراك الورث تراب وحيطان الأيام طين
وعيالك بيك مش بيك عايشين !!
يو.....ه يا رمان مشوار طولان
واللي يطوِّله يوم عن يومه يا حبيبي .. حمار !!
الدوا عاوزاه لوجيعة الركبةمش لطوالة العمر
إوعى تصدق ألوانها صفر وحمر
مش كنت جميلة يا واد؟مش كنت وكنت
وجَدَعَة تخاف مني الرجال ..؟
لكن فين شفتوني ..؟كنتوا عيال!
بناتي رضية ونجية ماتوا وراحواوأنا اللي قعدت طيِّب يا زمان ..!
إوعى تعيش يوم واحد بعد عيالك إوعى يا عبد الرحمان
في الدنيا وجع وهموم أشكال والوان الناس مابتعرفهاش أوعرهم لو حتعيش بعد عيالك ما تموت .. !ساعتها بس ...حاتعرف إيه هوّه الموت !أول مايجي لك .. نط !لسه بتحكي لهم بحرى حكايةفاطنة وحراجي القط..؟
آ.. باي ماكنت شقي وعفريت من دون كل الولدات
كنت مخالف ..برّاوي..وكنت مخبي في عينيك السحراوي تمللي حاجات زي الحداية ..تخوي ع الحاجة .. وتطيرمن صغرك بضوافر واعرة .. ومناقيربس ماكنتش كداب وآديني استنيت في الدنيا لما شعرك شاب ..!
قِدِم البيت اتهدت قبله بيوت و بيوت وأصيل هومستنيني لما أموت .. !
حاتيجي العيد الجاي؟
واذا جيت حاتجيني لجاي؟
وحتشرب مع يامنة الشاي .؟؟
حاجي ياعمةوجيت لالقيت يامنة ولا البيت
